អ្វីទៅជាISO ២២០០០:២០០៥?

អ្វីទៅជាISO ២២០០០:២០០៥?

បន្លែនៅតាមផ្សារ

មានជំងឺជាង២០០ប្រភេទដែលឆ្លងតាមចំណីអាហារ ដូច្នេះការទទួលបានអាហារដែលមានសុវត្ថិភាព និងនិរន្តភាព គឺជាបញ្ហាប្រឈមដ៏ធំមួយរបស់ពិភពលោក។ ដូច្នេះហើយទើបស្តង់ដាសុវត្ថិភាពចំណីអាហារ ISO ២២០០០ បានដើរតួនាទីយ៉ាងសំខាន់ និងធ្វើបច្ចុប្បន្នភាពជាបន្តបន្ទាប់។ ស្តង់ដានេះ គឺជាប្រព័ន្ធគ្រប់គ្រងសុវត្ថិភាពម្ហូបអាហារ ដែលហៅកាត់ថា FSMS។ នោះតាមព័ត៌មានពីអង្គការស្តង់ដាអន្តរជាតិ (ISO) ដែលចេញផ្សាយកាលពីពេលថ្មីៗកន្លងទៅនេះ។
កម្ពុជាបានយកស្តង់ដានេះមកបកប្រែជាភាសាខ្មែរ សម្រាប់ប្រើនៅកម្ពុជា តាំងពីឆ្នាំ២០០០មកម្លេះ ដែលមានឈ្មោះថា CS ISO ២២០០០:២០០៥ ដោយបានចងក្រងជាសៀវភៅមានកម្រាស់ជាង៣០ទំព័រ។
ស្តង់ដា ២២០០០:២០០៥ នេះមានតួនាទីសំខាន់ គឺគ្រប់គ្រងគ្រោះថ្នាក់ម្ហូបអាហារ តាមរយៈការគ្រប់គ្រងគ្រោះថ្នាក់៣យ៉ាងទៅលើផលិតផល ដូចជាគ្រោះថ្នាក់ដោយគីមីសាស្រ្ត រូបសាស្រ្ត និងជីវសាស្រ្ត។ នេះបើតាមអនុប្រធាននាយកដ្ឋានវិញ្ញាបនបត្រកម្មនៃវិទ្យាស្ថានស្តង់ដាកម្ពុជា លោក សោម ណូ។
ប្រសាសន៍លោក សោម ណូ៖ «ចឹងរូបសាស្រ្តត្រូវធ្វើយ៉ាងម៉េច គ្រប់គ្រងរបៀបយ៉ាងម៉េច គីមីសាស្រ្តត្រូវគ្រប់គ្រងរបៀបយ៉ាងម៉េច គ្រប់គ្រងនៅពេលណា គ្រប់គ្រងតាំងពីពេលចូល តាំងពីវត្ថុធាតុដើម តាំងពីការទុកដាក់ តាំងពីការផលិតចុងក្រោយ។ ហើយបើមានគីមីសាស្រ្តនៅក្នុងហ្នឹងយើងមិនអាចបំបាត់ដោយកម្តៅបាននោះទេ។ (អ៊ី)ចឹងហើយបានជាទាមទារឱ្យមានការគ្រប់គ្រង»។
មន្រ្តីជំនាញរូបនេះបន្ថែមថា គីមីសាស្រ្តដែលមិនមានគ្រោះថ្នាក់ មានឯកសារចងក្រង ឬសន្លឹកទិន្នន័យសុវត្ថិភាពប្រើតែ១សន្លឹកតែប៉ុណ្ណោះ ខណៈគីមីមានគ្រោះថ្នាក់មានការចងក្រងរហូតដល់ជាង២០០ទំព័រ។
លោក សោម ណូ៖«ដូចជាការគ្រប់គ្រងក្លរ ក្លរដែលគេដាក់នៅក្នុងទឹក។ សន្លឹកទិន្នន័យសុវត្ថិភាពរបស់វាមានរហូតដល់២៥០ទំព័រ»។
លោក សោម ណូ បញ្ជាក់បន្ថែមពីតួនាទី ISO ២២០០០:២០០៥ យ៉ាងដូច្នេះ៖ «សហគ្រាសនៅពេលដែលគាត់អនុវត្តន៍គឺមានន័យថា សហគ្រាសហ្នឹងមានភាពគ្រប់គ្រងល្អិតល្អន់ មានភាពគ្រប់គ្រងម៉ត់ចត់ ទៅលើវត្ថុធាតុដើម តាំងពីវត្ថុធាតុដើមដែលខ្លួន តាំងពីវត្ថុធាតុដើមដែលខ្លួនទិញ រហូតដល់ដំណាក់កាលនៃការផលិតរហូតដល់ចុងក្រោយគឺគ្រប់គ្រងទៅលើផលិតផលរបស់ខ្លួន។ និយាយភាសាមួយទៀតគេហៅថា ការគ្រប់គ្រងពីកសិដ្ឋានរហូតដល់អ្នកបរិភោគ»។

គេហទំព័រស្តង់ដា
គេហទំព័រអង្គការស្តង់ដាអន្តរជាតិ (ISO)

ប្រធានសហគ្រាសផលិតទឹកត្រីនិងទឹកស៊ីអ៊ីវលាងឡេង លោក លាង ឡេង មានប្រសាសន៍ថា ការអនុវត្តន៍យកស្តង់ដានេះមិនងាយស្រួលនោះទេ គឺត្រូវការបុគ្គលិកដែលមានជំនាញខ្ពស់ ព្រោះជាដំណាក់កាលដែលវិភាគលម្អិតនូវមេរោគ និងបាក់តេរីផ្សេងៗកុំឱ្យមានការឆ្លងរីករាលដាលដល់ផលិតផល។ លោកបន្ថែមថា តែអ្វីដែលទទួលបានមកវិញគឺការគាំទ្រពីអតិថិជនទាំងក្នុងស្រុក និងក្រៅស្រុក។

ប្រសាសន៍លោក លាង ឡេង៖ «មុនពេលដែលខ្ញុំអនុវត្តន៍ស្តង់ដាISOនេះ ការទុកចិត្តរបស់អតិថិជន អ្វីជាដំណើរការនៃការផលិត វាមានភាពរញ៉េរញ៉ៃ ហើយមិនមានការទុកចិត្តកក់ក្តៅពីបណ្តាអ្នកទិញ អ្នកប្រើប្រាស់ទេ។ នៅពេលដែលខ្ញុំ សព្វថ្ងៃនេះសិប្បកម្មលាងឡេងខ្ញុំផ្ទាល់ គឺអនុវត្តន៍នៅលើផលិតផលទឹកត្រី ដែលផលិតទៅតាមស្តង់ដាISO និងHACCPនេះ គឺគតិយសដ៏ល្បីល្បាញនេះមានធ្វើឱ្យមានការកើនឡើង និងមានភាពជឿជាក់នៃអតិថិជនបានជាច្រើន»។
លោក សោម ណូ អនុប្រធាននាយកដ្ឋានវិញ្ញាបនបត្រកម្មនៃវិទ្យាស្ថានស្តង់ដាកម្ពុជាសង្កត់ធ្ងន់ថា សម្រាប់ក្រុមហ៊ុនដែលចង់អនុវត្តន៍យកស្តង់ដានេះ ចាំបាច់ត្រូវឆ្លងកាត់ការអនុវត្តស្តង់ដាប្រព័ន្ធមួយចំនួនជាមុនសិន គឺចាប់តាំងពីការអនុវត្តន៍ផលិតកម្មល្អ (GMP) ការអនុវត្តប្រព័ន្ធកំណត់អត្តសញ្ញាណវាយតម្លៃ (HACCP )ប្រព័ន្ធគ្រប់គ្រងគុណភាព (ISO ៩០០១:២០១៥) ហើយHACCP ដើរតួនាទីសំខាន់ក្នុងការអនុវត្តយកស្តង់ដាISO ២២០០០:២០០៥ នេះ៕

ចែករំលែកតាម៖