ពិព័រណ៍​ពាណិជ្ជកម្ម​ផ្សព្វផ្សាយ​ផលិតផល​ខ្មែរ​នឹង​ធ្វើឡើង​ក្នុង​ខែ​មិថុនា​ខាងមុខ

ពិព័រណ៍​ពាណិជ្ជកម្ម​ផ្សព្វផ្សាយ​ផលិតផល​ខ្មែរ​នឹង​ធ្វើឡើង​ក្នុង​ខែ​មិថុនា​ខាងមុខ

ពិព័រណ៍ពាណិជ្ជកម្មខេត្តកំពង់ស្ពឺ លើកទី៥ ឆ្នាំ២០១៧ សហការរៀបចំដោយ​សាលាខេត្តកំពង់ស្ពឺ មន្ទីរពាណិជ្ជកម្ម សភាពាណិជ្ជកម្ម និងតំណាងក្រុមហ៊ុនកម្ពុជា វៀតណាម និងថៃ (រូបថតពីហ្វេសប៊ុកក្រសួងពាណិជ្ជកម្ម)

ក្រសួង​ពាណិជ្ជកម្ម​លើកឡើងថា ពិព័រណ៍​កសិកម្ម​និង​ផលិតផល​ខ្មែរ មិន​ត្រឹមតែ​ជួយ​រួមចំណែក​ពង្រឹង​ធនធាន​មនុស្ស​ប៉ុណ្ណោះ​ទេ វា​ក៏​ជា​ជំហាន​ថ្មី​ជួយ​កែ​ទម្លាប់​ពលរដ្ឋ​ទាំង​នៅ​ទីក្រុង​និង​ជនបទ​ឱ្យ​ចេះ​ធ្វើ​កសិកម្ម​ឡើងវិញ​។​

​ការលើកឡើង​របស់​ក្រសួង​ពាណិជ្ជកម្ម ធ្វើឡើង​តាមរយៈ​សេចក្តីជូនដំណឹង ដែល​បាន​ផ្សព្វផ្សាយ​កាលពីដើម​ខែ​មេសា​។​
​សេចក្តីជូនដំណឹង​របស់​ក្រសួង​ពាណិជ្ជកម្ម​បាន​ឱ្យដឹង​ថា ខេត្ត​ស្វាយរៀង​គឺជា​ទិសដៅ​សំខាន់​ដែល​ក្រសួង​នឹង​រៀបចំ​ពិព័រណ៍​ពាណិជ្ជកម្ម​ផលិតផល​ខ្មែរ ដើម្បី​ផ្សព្វផ្សាយ​និង​លើកកម្ពស់​ផលិតផល​ខ្មែរ នៅ​ឆ្នាំ​២០១៧​នេះ​។​

​សេចក្តីជូនដំណឹង​ដដែល​ឱ្យដឹងទៀតថា ពិព័រណ៍​ពាណិជ្ជកម្ម​ផលិតផល​ខ្មែរ​នឹង​ត្រូវ​ធ្វើឡើង​នា​ឱកាស «​យុទ្ធនាការ​ទិញ​ផលិតផល​ខ្មែរ​ឆ្នាំ​២០១៧» ដែល​មាន​រយៈពេល​៤​ថ្ងៃ គឺ​ចាប់ពី​ថ្ងៃ​ទី​២២ ដល់​ថ្ងៃ​២៥ ខែ មិថុនា​។​

​សេចក្តីជូនដំណឹង​ដដែល​បញ្ជាក់​ថា ពិព័រណ៍​ពាណិជ្ជកម្ម​ផលិតផល​ខ្មែរ មិន​ត្រឹមតែ​ផ្សព្វផ្សាយ​និង​លើកកម្ពស់​ផលិតផល​ខ្មែរ​ប៉ុណ្ណោះ​ទេ វា​ក៏​ធ្វើឡើង​ក្នុង​បំណង​ដើម្បី​ពញ្ញាក់​ស្មារតី​មហាជន​ទូទៅ ឱ្យ​ងាក​មក​គាំទ្រ និង​ប្រើប្រាស់​ផលិតផល​ក្នុងស្រុក​ឱ្យបាន​កាន់តែ​ច្រើនឡើង​។​

​ទាក់ទិន​នឹង​ពិព័រណ៍​ពាណិជ្ជកម្ម​ផលិតផល​ខ្មែរ​នេះដែរ អ្នកនាំពាក្យ​ក្រសួង​ពាណិជ្ជកម្ម កញ្ញា សឹង សុ​ផា​រី បាន​ប្រាប់​វិទ្យុ​ផ្កាឈូក​ថា នេះ​គឺជា​ទិសដៅ​របស់​ក្រសួង​ពាណិជ្ជកម្ម ដើម្បី​ជំរុញ​ការលើក​មុខ​លើក​មាត់ ផលិតផល​ខ្មែរ ឱ្យ​កាន់តែ​ទូលំ​ទូលាយ​ជាង​មុន​។ កញ្ញា​បន្តថា  ពិព័រណ៍​នេះ​មាន​សារៈសំខាន់​ណាស់ ដល់​អ្នក​ផលិត​និង​កសិករ  ដើម្បី​រៀន​ពី​គ្នា​ទៅ​វិញ​ទៅមក ព្រោះ​ពិព័រណ៍​នេះ នឹង​មាន​ការ​ដាក់​តាំង​បង្ហាញ​ពី​ផលិតផល​ខ្មែរ​ជាច្រើន​ប្រភេទ​៖ «​អ៊ីចឹង​ក្នុងនាម​ជា​ក្រសួង ក៏ដូចជា​អ្នកដើរ​ពពាយនាយ​អ៊ីចឹង តាំងពិព័រណ៍​ពាណិជ្ជកម្ម បើ​និយាយ​ន័យធៀប​វា​ដូចគ្នា​អ៊ីចឹង​។ ពិព័រណ៍​រាល់ថ្ងៃ​ហ្នឹង មិន​ថា​នៅ​ខេត្ត​ណា មិន​ថា​នៅ​ទីតាំង​ណា មិន​ថា​ពេល​ណា​ទេ គោលបំណង​ធម្មតា​មួយ​គឺ​ដើរ​លក់ បង្ហាញ​ផលិតផល​ខ្លួនឯង​។ អ៊ីចឹង​ជា​ការផ្សារភ្ជាប់​ទំនិញ​ជាមួយ​និង​ប្រជាជន ដឹង​ថា​ទំនិញ​ក្នុងស្រុក​មាន​អី ទំនិញ​ក្រៅ​ស្រុក​ដែល​នាំមក​ពី​ក្រៅ​មានអី​»​។

​បន្ថែម​ពី​នេះ​ទៀត អ្នកនាំពាក្យ​ក្រសួង​ពាណិជ្ជកម្ម កញ្ញា សឹង សុ​ផា​រី  ឱ្យដឹងថា ទោះជា​បច្ចុប្បន្ន​ប្រជាពលរដ្ឋ​ខ្មែរ​ចាប់ផ្តើម​ងាក​មក​ចាប់​អារម្មណ៍​ប្រើប្រាស់​ផលិតផល​ក្នុង​ស្រុក​ច្រើន​ជាមុន  កញ្ញា​ក៏​នៅ​មាន​ការបារម្ភ​មួយចំនួន​ដូចជា កង្វះ​ធន​ធាន​មនុស្ស​ក្នុង​វិស័យ​កសិកម្ម ខណៈ​កំណើន​តម្រូវការ​ប្រជាជន​លើ​ផលិតផល​កសិកម្ម​កាន់​តែ​ច្រើន​។ កញ្ញា​ថា បញ្ហា​នេះ​នឹង​ជំរុញ​ប្រទេស​កម្ពុជា​មាន​ការអភិវឌ្ឍ​ន៍​យឺត​។

​ហេតុនេះ កញ្ញា​រំពឹងថា ពិព័រណ៍​កសិកម្ម​ផលិតផល​ខ្មែរ ដែល​រៀបចំ​រយៈពេល​៤​ថ្ងៃ ដោយ​មាន​ការចូលរួម​ពី​បណ្តា​ក្រុមហ៊ុន និង​សហគ្រាស​ធន​តូច​និង​មធ្យម នឹង​រួមចំណែក​ពង្រឹង​ធនធានមនុស្ស​ក្នុង​វិស័យ​កសិកម្ម​កាន់តែ​ប្រសើរ​ជាង​មុន​៖ «​ឥឡូវ​ការប្រើប្រាស់​របស់​ប្រជាជន និង​ឥរិយាបថ​របស់​អ្នកប្រើប្រាស់ Consumer Behavior របស់​យើង វា​ដូរ​ពីមុន​ដោយសារ​ការយល់ដឹង ការផ្សព្វផ្សាយ​របស់​យើង​ហ្នឹង​។ មួយទៀត​គុណភាព​ទំនិញ​របស់​យើង​ក៏​ងើប​ជាង​មុន​ដែរ​។ ពី​ដើមឡើយ​យើង​ធ្វើ​វា​អន់​មែន គេ​ថា​អន់​ហ្នឹង​គឺ​វា​ត្រូវ​របស់​គេ​ហើយ ឥឡូវ​អ្នក​ផលិត​ក្នុងស្រុក គាត់​ផលិត​បាន​គុណភាព​មួយ​ដែល​វា​ល្អ​ដែរ​។ អ៊ីចឹង​នៅពេល​ដែល​អ្នកប្រើប្រាស់​គាត់​ដឹង​ថា​មាន​ទំនិញ​លក់ មាន​ចរាចរណ៍​ក្នុង​ស្រុក​ហ្នឹង​គាត់​អាច​ដឹង​ច្រើន​ថា​ទំនិញ​ណា​របស់​ខ្មែរ ទំនិញ​ណា​នាំ​ចេញ​នាំ​ចូល ក្រុមហ៊ុន​ណា​អ្នក​ផលិត​ទំនិញ​ហ្នឹង​។ អ៊ីចឹង​វា​ជួយ​បាន​ច្រើនណាស់ ការពារ​ការប្រើប្រាស់​ទំនិញ​ក្លែងក្លាយ​ផង ទំនិញ​ខូច​គុណភាព​ផង យល់ដឹង​របស់​យកមក​ពី​ក្រៅ របស់​ណា​ផលិត​ក្នុងស្រុក​បាន អ៊ីចឹង​គាត់​អាច​ធ្វើ​ការសម្រេចចិត្ត​ប្រសើរ​ជាង​មុន​»​។​

​ទន្ទឹម​គ្នា​នេះ​ដែរ សាស្ត្រាចារ្យ​ផ្នែក​ក​សិ​-​ឧស្សាហកម្ម នៃ​សាកលវិទ្យាល័យ​ភូមិន្ទ​កសិកម្ម ដែល​នឹង​ចូលរួម​ដាក់តាំង​បង្ហាញ​ផលិតផល​ក្នុង​ពិព័រណ៍​នេះដែរ អ្នកស្រី អោម វិទូ បង្ហាញ​ក្តីរំពឹង​ទុក​ថា ពិព័រណ៍​នេះ​មាន​សារៈសំខាន់​ជួយ​ឱ្យ​និស្សិត​ផ្នែក​កសិកម្ម និង​ប្រជាពលរដ្ឋ​អាច​សិក្សា​ស្វែងយល់​ពី​បច្ចេកទេស​កសិកម្ម​ដូចជា ការសិក្សា​ពី​ការប្រើប្រាស់​ពូជ ជី​កសិកម្ម ការថែទាំ ការកែច្នៃ​ចំណីអាហារ​តាមរយៈ​ការប្រឹក្សា​យោបល់​ជាមួយ​ក្រុមហ៊ុន និង​បណ្ដា​ប្រទេស​ដែល​រីកចម្រើន​លើ​វិស័យ​កសិកម្ម​ជាដើម​៖ «​កម្មវិធី​នេះ​ខ្ញុំ​គិតថា​មាន​សារសំខាន់​ណាស់​ព្រោះ​អី​អាច​ចែក​ភស្តុតាង​ដែល​កូនសិស្ស​គាត់​បាន​ធ្វើ​»​។​

​ជា​កសិករ​មកពី​ខេត្ត​ស្វាយរៀង លោក សឹម ឌី សាទរ​ចំពោះ​ពិព័រណ៍​ដែល​គ្រោង​រៀបចំ​នៅក្នុង​ខេត្ត​ស្វាយរៀង​នេះ ព្រោះ​លោក​យល់ឃើញថា បច្ចុប្បន្ន​ការយកចិត្តទុកដាក់​បណ្ដុះបណ្ដាល​កសិករ ពិសេស​យុវជន​ឱ្យ​យល់ដឹង​ពី​ការដាំដុះ​បន្លែ​សរីរាង្គ​​នៅ​មាន​កម្រិត និង​​មិន​​ទាន់​​ស្រប​តាម​សម័យ​បច្ចេកវិទ្យា​ទំនើប ឬ​ស័ក្ដិសម​នឹង​ប្រទេស​ដែល​យក​វិស័យ​កសិកម្ម​ជាធំ​នោះ​ទេ​។ ករណីនេះ លោក​គាំទ្រ​ឱ្យមាន​កម្មវិធី​ពិព័រណ៍​កសិកម្ម​ឱ្យ​កាន់តែច្រើន ដើម្បី​បណ្ដុះ​គំនិត​ពលរដ្ឋ​ខ្មែរ ពិសេស​កសិករ ឱ្យ​យល់ដឹង​ពី​ការងារ​កសិកម្ម និង​ផ្ដល់​ទីផ្សារ​ជូន​កសិករ​។​

​ក្រសួង​ពាណិជ្ជកម្ម​អះអាងថា ដើម្បី​ឱ្យ​ពិព័រណ៍​ពាណិជ្ជកម្ម​ផលិតផល​ខ្មែរ​នេះ មាន​ការគាំទ្រ​ច្រើន ក្រសួង​នឹង​ប្រមូល​កៀងគរ​ផលិតផល​ខ្មែរ ដែល​មាន​គុណភាព​ខ្ពស់ មាន​សុវត្ថិភាព​សម្រាប់​អ្នកប្រើប្រាស់ មានការ​វេច​ខ្ចប់​បាន​ល្អ​ត្រឹមត្រូវ អនុលោម​តាម​ស្តង់ដារ​ផលិតកម្ម ពី​គ្រប់ទិសទី​នៅ​ទូទាំង​ប្រទេស មក​ដាក់​តាំង​បង្ហាញ​។ ក្រសួង​ឱ្យដឹងទៀតថា ពិព័រណ៍​ពាណិជ្ជកម្ម​ផលិតផល​ខ្មែរ​នេះ​នឹង​បង្ក​ឱកាស​ឱ្យ​ប្រជាពលរដ្ឋ​បានដឹង និង​ស្វែងយល់​ពី​ផលិតផល​ខ្មែរ​កាន់តែ​ច្បាស់​ថែម​ទៀត​។​

​ក្រសួង​ពាណិជ្ជកម្ម ក៏​បាន​អំពាវនាវ​ដល់​សារ​ធា​រណ​ជន ដែល​មាន​បំណង​ចូលរួម​តាំង​បង្ហាញ​ផលិតផល​ខ្មែរ​ក្នុង​ព្រឹត្តិការណ៍​នេះ ត្រូវ​ដាក់​ពាក្យ​ចូលរួម​តាមរយៈ​នាយកដ្ឋាន​កិច្ចការ​ពិព័រណ៍​នៃ​អគ្គនាយកដ្ឋាន​ជំរុញ​ពាណិជ្ជកម្ម នៃ​ក្រសួង​កសិកម្ម ព្រោះ​ចំនួន​ស្តង់​មានកំណត់​៕

ចែករំលែកតាម៖