កម្ពុជា​ចាប់ផ្តើម​គម្រោង​ផលិតកម្ម​ស្រូវ​ប្រកបដោយ​និរន្ត​ភាព​

កម្ពុជា​ចាប់ផ្តើម​គម្រោង​ផលិតកម្ម​ស្រូវ​ប្រកបដោយ​និរន្ត​ភាព​

អ្នក​ធ្វើ​ការពាក់ព័ន្ធ​ក្នុង​វិស័យ​ស្រូវ​អង្ករ លើកឡើងថា ការចាប់ផ្តើម​អនុវត្តន៍​គម្រោង​ផលិតកម្ម​ស្រូវ​ប្រកបដោយ​និរន្ត​ភាព​គឺជា​ជំហាន​ថ្មី​មួយ​ឈាន​ទៅ​ដោះស្រាយ​បញ្ហា​ប្រឈម​ក្នុង​វិស័យ​កសិកម្ម ពិសេស​ជំរុញ​ការនាំ​ចេញ​អង្ករ​ទៅ​ទីផ្សារ​អន្តរជាតិ​កាន់តែ​ប្រសើរឡើង​។​

​ការលើកឡើង​នេះ ធ្វើឡើង​នៅក្នុង​សិក្ខាសាលា​ស្តីពី​គម្រោង​ផលិតកម្ម​ស្រូវ​ប្រកប​ដោយ​និរន្ត​ភាព ដែល​បាន​ធ្វើឡើង​នៅ​ថ្ងៃ​ទី​២០ ខែ​មិថុនា​នេះ​។​

​អគ្គនាយករង​នៃ​អគ្គនាយកដ្ឋាន​កសិកម្ម​របស់​ក្រសួង​កសិកម្ម រុក្ខា​ប្រមាញ់ និង​នេសាទ លោក ប្រាក់ ជាតិ​ថូ ថ្លែងថា ទិសដៅ​សំខាន់​នៃ​គម្រោង​រយៈពេល​បី​ឆ្នាំនេះ គឺ​បង្កើន​ការផលិត​ពូជស្រូវ​ក្រអូប​និង​ផលិត​ពូជស្រូវ​សុទ្ធ​ល្អ​គ្រប់​ចំនួន ដើម្បី​ជួយ​ឱ្យ​កសិករ​មាន​គ្រាប់ពូជ​ត្រឹមត្រូវ​សម្រាប់​ដាំ​ដុះ ស្រប​តាម​តម្រូវការ​ទីផ្សារ​៖ «​ហើយ​គម្រោង​នេះ មាន​អត្ថប្រយោជន៍​ណាស់​សម្រាប់​ប្រជាកសិករ​របស់​យើង​។ ទី​១ គឺ​ទីផ្សារ កាលណា​គម្រោង​ដំណើរការ​ទៅ គាត់​ជួយ​ផ្តល់​ជា Trade mark ជា​ឡូហ្គោ​ថា​ផលិតផល​នេះ​ល្អ អាច​នាំ​ចេញ​ទៅ​ប្រទេសក្រៅ​បាន អ៊ីចឹង​វា​ជួយ​ដល់​ទីផ្សារ ហើយ​ជួយ​ជំរុញ​ឱ្យ​កសិករ​យើង​ផលិត​ឱ្យ​បាន​គុណភាព​ល្អ ជួយ​ដល់​កសិករ​យើង​ខាង​វិស័យ​យេនឌ័រ ហើយ​គុណភាព​ខាង​សុខភាព​យើង​ក៏​ល្អ យើង​ប្រើ​ថ្នាំពុល​(​ថ្នាំ​សម្លាប់​សត្វល្អិត​)​មាន​កម្រិត និង​ជួយ​ផ្តល់​នូវ​ពូជ ជួយ​ដល់​កសិករ​យើង​ឱ្យ​គាត់​ផលិត​ស្រូវ​ណា​ដែល​មាន​ទីផ្សារ​»​។​

​តំណាង​ក្រុមហ៊ុននាំចេញ​អង្ករ លោក សុង សារ៉ន មានប្រសាសន៍ថា គម្រោង​ផលិតកម្ម​ស្រូវ​ប្រកប​ដោយ​និរន្ត​ភាព ដែល​ទទួលបាន​ប្រាក់ឧបត្ថម្ភ​ពី​ស្ថានទូត​កាណាដា តាមរយៈ​សាជីវកម្ម​ហិរញ្ញវត្ថុ​អន្តរជាតិ (IFC) ពី​ឆ្នាំ​២០១៧ ដល់​ឆ្នាំ​២០១៩ ប្ដេជ្ញា​ផលិត​ពូជស្រូវ​ក្រអូប​ចំនួន ចាប់ពី​ជាង ៧០០០​តោន ទៅ​៣​ម៉ឺន​តោន​ក្នុង​មួយ​ឆ្នាំ​។​

​អគ្គនាយក​ក្រុមហ៊ុននាំចេញ​អង្ករ អេម​រុរ៉ាយ​ស៍ (AMRU RICE) រូបនេះ​បន្ត​ថា ជា​ជំហាន​ដំបូង ដំណើរការ​គម្រោង​ផលិត កម្ម​ស្រូវ​ប្រកបដោយ​និរន្ត​ភាព​នឹង​ប្រើប្រាស់​ថវិការ​ប្រមាណ​ជាង​១០​ម៉ឺន​ដុល្លារ​អាមេរិក ជាមួយ​សហគមន៍​ចំនួន​៤ មកពី​ខេត្ត​កំពង់ចាម និង​ខេត្ត​បាត់ដំបង​។ គម្រោង​នេះ​មាន​សមាជិក​ចំនួន​៧២៩​គ្រួសារ លើ​ផ្ទៃដី​២១២០​ហិតា សម្រាប់​ផលិត​ស្រូវ​៣​ប្រភេទ​គឺ​ផ្ការំដួល​ខ្មែរ​ពិសេស IR​គ្រាប់​វែង និង​ស្រូវ​សែន​ក្រអូប​ខ្មែរ​ពិសេស​។​

លោក សុង សារ៉ន រំពឹងថា គម្រោង​នេះ​នឹង​ផ្តល់​ផល​ចំណេញ​ច្រើន​ដល់​កសិករ​ខា្ន​តតូច ជំរុញ​ការនាំចេញ​ផលិតផល​កសិកម្ម ជួយ​លើកស្ទួយ​កេរ្តិ៍ឈ្មោះ​ផលិតផល​កម្ពុជា លើកកម្ពស់​ជីវភាព​កសិករ​កម្ពុជា ពិសេស​ជួយ​បញ្ចៀស​ឱនភាព​សេដ្ឋកិច្ចជាតិ​៖ «​កសិករ​គាត់​បាន​ប្រយោជន៍ ទី​១ គាត់​បាន​ចំណូល​ថេរ​។ ចំណូល​ថេរ​គឺ​បានន័យថា​គាត់​កើន​ឡើង​ជាង​មុន ហើយ​ធានា​បាន​នូវ​ទីផ្សារ​។ យើង​ធានា​ទិញ​របស់​គាត់​ទាំងអស់​អ្វី​ដែល​យើង​សន្យា​ហ្នឹង ហើយ​ទី​៣ គាត់​ធានា​បាន​ការរក្សា​នូវ​ភូមិឋាន​ល្អ ស្អាត​ដោយ​មិន​មាន​ជាតិពុល នៅក្នុង​មូលដ្ឋាន​របស់​គាត់ ទាំង​រស់​នៅ ក៏ដូចជា​នៅ​វាលស្រែ អត់​ឱ្យមាន​ថ្នាំពុល​ធ្វើឱ្យ​មិន​សុវត្ថិភាព​ដល់​កូន​ចាំ​គាត់​ទេ ដោយសារ​តែ​យើង​ដឹង​ហើយ កាល​ដែល​យើង​ប្រើប្រាស់​ថ្នាំពុល​នេះ​ភាគច្រើន គ្រោះ​ថ្នាក់​ទាំង​អ្នក​បាញ់ថ្នាំ និង​អ្នក​ហូប ដូច្នេះ​ហើយ​យើង​ទប់ស្កាត់​ហ្នឹង​បាន ហើយ​កសិករ​ទទួល​បាន​ប្រយោជន៍​មួយទៀត​នោះ គឺ​ប្រយោជន៍​យូរអង្វែង បានន័យថា គាត់​នៅ​ពេល​ណា​ដែល​លទ្ធផល​នេះ​ដើរ​ហើយ គាត់​នឹង​ទទួល​បាន​ប្រយោជន៍​បែបនេះ កើន​ឡើង​ទៅ​តាម​តម្រូវការ​ទីផ្សារ​ហើយ​គុណភាព​ដែល​គាត់​ផលិត​បាន​។ អ៊ីចឹង​នៅពេលណា​ដែល​គុណភាព​ល្អ គឺ​គាត់​ត្រូវតែ​បាន​ចំណូល​កើនឡើង​ច្រើន​»​។​

​គម្រោង​ផលិតកម្ម​ស្រូវ​ប្រកប​ដោយ​និរន្ត​ភាព (SRP) គឺ​ត្រូវបាន​ទទួលស្គាល់​ពី​វេទិកា​ពហុ​អ្នកពាក់ព័ន្ធ​ដែល​បង្កើតឡើង​ដោយ​អង្គការសហប្រជាជាតិ​បរិស្ថាន (UNEP) និង​វិទ្យាស្ថាន​ស្រាវជ្រាវ​អង្ករ​អន្តរជាតិ (IRRI)​។ វា​មាន​គោលបំណង​លើក​កម្ពស់​ប្រសិទ្ធភាព​ធនធាន និង​និរន្តរភាព​ក្នុង​លំហូរ​ពាណិជ្ជកម្ម​ប្រតិបត្តិការ​ផលិតកម្ម​និង​ការផ្គត់ផ្គង់ និង​ចង្វាក់​ផ្គត់ផ្គង់​។​
​នៅ​ឆ្នាំ​២០១៥ រដ្ឋាភិបាល​កម្ពុជា​កំណត់​ផែនការ​នាំ​អង្ករ​ចេញ​ទៅ​ក្រៅប្រទេស​យ៉ាងតិច​ចំនួន​១​លាន​តោន ក៏ប៉ុន្តែ​មិន​អាច​សម្រេចបាន​ដូច​ការគ្រោងទុក​។​

​ក្រសួង​កសិកម្ម ក្រុមហ៊ុននាំចេញ​អង្ករ និង​សាជីវកម្ម​ហិរញ្ញវត្ថុ​អន្តរជាតិ (IFC) អះអាងថា ភាគី​ពាក់ព័ន្ធ​នឹង​ខិតខំ​កែលម្អ​ហេដ្ឋារចនាសម្ព័ន្ធ​ស្រោចស្រព ផ្តល់​វគ្គ​បណ្តុះបណ្តាល​ប​ច្ចេកទេស​ផលិត​គ្រាប់​ពូជស្រូវ​សុទ្ធ​ដល់​កសិករ ផ្តល់​ទីផ្សារ​និង​តម្លៃ​សមរម្យ​ដល់​កសិករ​ដែល​ជា​ក្រុម​គោលដៅ​គម្រោង ដើម្បី​ឱ្យ​គម្រោង​ផលិតកម្ម​ស្រូវ​ប្រកបដោយ​និរន្ត​ភាព​នេះ​សម្រេច​ជោគ​ជ័យ​​និង​ឈាន​ទៅ​សម្រេច​ទិស​នាំ​អង្ករ​ចេញ​ទៅ​កាន់​ទីផ្សារ​អន្តរជាតិ​៕

ចែករំលែកតាម៖