អ្នកមានវិបត្តិដំណេកត្រូវទៅប្រឹក្សាជាមួយគ្រូពេទ្យជាជាងទៅរកសេវាថ្នាំពេទ្យ

អ្នកមានវិបត្តិដំណេកត្រូវទៅប្រឹក្សាជាមួយគ្រូពេទ្យជាជាងទៅរកសេវាថ្នាំពេទ្យ

មនុស្ស​គ្រប់រូប​មិនអាច​ចៀសផុត​ពី​បញ្ហា​វិបត្តិ​ដំណេក​ឡើយ ដោយ​គ្រាន់​តែ​ថា អ្នកខ្លះ​ងងុយ តែ​មិនអាច​គេង​បាន ដោយ​សារ​មមាញឹក​នឹង​ការងារ ឬ​ជំនួញ​ជា​ដើម។ ចំណែក​អ្នកខ្លះ​ទៀតមាន​ពេល​គេង​គ្រប់គ្រាន់ តែ​គេង​មិន​លក់។

យុវជន​មួយចំនួន​មាន​បញ្ហា​វិបត្តិដំណេកទាក់ទង​ទៅ​នឹង​ការសិក្សា ឬ​ការវ៉ក់​នឹង​ការលេងហ្គេម​តាម​អនឡាញ។ ដោយ​សារពួកគេ​បាន​ប្រើប្រាស់​ពេលវេលា​ហួសពេក ហើយ​ចូល​គេង​នៅ​កណ្តាល​អធ្រាត។

សិក្ខា​កាម​ម្នាក់ និង​ជា​និស្សិត​សាកលវិទ្យាល័យ​វិទ្យាសាស្រ្ត​សុខាភិបាល លោក លៀង សុខឆេង បាន​ប្រាប់​ពី​ផលប៉ះពាល់​ដែល​ខ្លួន​សម្រាន្ត​មិនគ្រប់​កន្លង​មកយ៉ាង​ដូច្នេះ​ថា៖ «ដំបូងឡើយនៅពេលខ្ញុំគេងអត់លក់ ដូចខួរក្បាលហ្នឹងគិតអីអត់ចេញ សម្រេចចិត្តស្តាប់អីគឺអត់បានតែម្តង។ [ខ្ញុំ]មានបញ្ហា ដូចជាសុខភាពទ្រុឌទ្រោម កើតរាងកើតផ្តាសាយតិច ឈឺក្បាលតិចតែម្តង មានអារម្មណ៍ស្ងាបងងុយគេង ហើយព្រឹកឡើង គឺអត់ចង់ធ្វើអីនោះទេ។»។

លោកលៀង សុខឆេង ​និស្សិត​សាកលវិទ្យាល័យ​វិទ្យសាស្រ្ត​សុខាភិបាល
លោក លៀង សុខឆេង ​និស្សិត​សាកលវិទ្យាល័យ​វិទ្យសាស្រ្ត​សុខាភិបាល

ដោយ​មើល​ឃើញ​នូវ​បញ្ហា​នេះ ក្រុម​ការងារ​នៃ​វិទ្យុផ្កាឈូក​សហការ​ជា​មួយ​សមាគម​ពាណិជ្ជកម្ម​និង​វិនិយោគ​កម្ពុជា​ជប៉ុន​ CJBI រួម​ជា​មួយ​អ្នកជំនាញ​ទាំងផ្នែក​ពុទ្ធចក្រ និង​អាណាចក្រតែង​រៀបចំ​សិក្ខាសាលា​អប់រំ​ជា​រៀងរាល់​ខែ។ នេះ​បើ​តាម​ប្រធាន​CJBI លោក អៀង សុធារ៉ា។

ប្រសាសន៍​ លោក អៀង សុធារ៉ា៖ «រាល់សិក្ខាសាលាទាំងអស់គឺសំដៅធ្វើយ៉ាងណាឱ្យមានសុខភាពផ្លូវកាយល្អ ហើយនិងសុខភាពផ្លូវចិត្តហ្នឹងល្អ ដូចជាថ្ងៃនេះយើងនិយាយអំពីវិបត្តិដំណេកមានន័យថា ភាគច្រើនគឺពាក់ព័ន្ធនឹងសុខភាពផ្លូវចិត្ត»។

លោកអៀង សុធារ៉ា ​​សមាគម​ពាណិជ្ជកម្ម​និង​វិនិយោគ​កម្ពុជា​ជប៉ុន​CJBI
លោក អៀង សុធារ៉ា ​​សមាគម​ពាណិជ្ជកម្ម​និង​វិនិយោគ​កម្ពុជា​ជប៉ុន​CJBI

ជាក់​ស្តែង លើ​បញ្ហាវិបត្តិ​ដំណេក​នេះ លោក អៀង សុធារ៉ា ដែល​ធ្លាប់​មាន​បទពិសោធន៍​ខាង​ផ្នែក​វេជ្ជសាស្រ្ត​ដែរ​នោះបញ្ជាក់​ថា លោក​មិន​គាំទ្រ​ឱ្យ​មាន​ការ​ព្យាបាល​ដោយ​ខ្លួន​ឯង ដោយ​ប្រើប្រាស់​ឱសថ​នោះទេ ប៉ុន្តែ​អ្នក​មាន​បញ្ហា​វិបត្តិ​ដំណេក​គួរ​ចេះ​ធ្វើ​សមាធិ ស្តាប់​ព្រះធម៌ និង​ស្វែង​រក​សេវា​ប្រឹក្សា​ពី​គ្រូពេទ្យ​ជំនាញ។

ប្រសាសន៍​ លោក អៀង សុធារ៉ា៖ «កុំសម្រេចធ្វើគ្រូពេទ្យដោយខ្លួនឯង។ កុំសម្រេចធ្វើគ្រូពេទ្យដោយខ្លួនឯងសម្រាប់បងប្អូននៅជុំវិញខ្លួន។ (អ៊ី)ចឹងនាំគាត់ទៅរកគ្រូពេទ្យណាដែលគាត់មានជំនាញច្បាស់លាស់»។  

យ៉ាង​ហោច​ណាស់ ក្នុង​មួយ​ថ្ងៃ អ្នក​ដែល​មក​រក​សេវា​ប្រឹក្សា​ទាក់ទង​នឹង​បញ្ហា​ដំណេក នៅ​មន្ទីរពេទ្យ​មិត្តភាព​ខ្មែរ​សូវៀតមាន​ចាប់​ពី​ប្រាំទៅ​ប្រាំពីរយ​នាក់ ខណៈ​ភាគ​ច្រើន​នៃ​អ្នកជំងឺ​ផ្លូវចិត្ត គឺ​សុទ្ធសឹង​តែ​ពាក់ព័ន្ធ​នឹង​រោគសញ្ញា​វិបត្តិដំណេក​នេះ​ទាំងអស់។ វិបត្តិដំណេក​មិនមែន​ជា​ជំងឺទេ ប៉ុន្តែ​វា​គ្រាន់​តែ​ជា​សញ្ញា​មួយ។ ដោយ​ឡែក ករណី​ខ្លះ ក៏​ជា​ជំងឺដែរ។ ទាំងនេះ​បើ​តាម​នាយ​ផ្នែក​ជំងឺ​ផ្លូវចិត្ត និង​ការ​បំពាន​គ្រឿងញៀន​នៃ​មន្ទីរពេទ្យ​មិត្តភាព​ខ្មែរសូវៀត វេជ្ជបណ្ឌិត​ យឹម សុបុត្រា។

វេជ្ជបណ្ឌិត​ជំនាញ​វិកលវិទ្យាវ័យ​៥០ឆ្នាំ​រូបនេះអះអាង​បន្ថែម​ប្រាប់​អ្នក​ចូលរួម​ជាង​បីរយនាក់នៅ​ក្នុង​សិក្ខាសាលា​ដដែល​នោះយ៉ាងដូច្នេះ​ថា៖ «[មិន]មែនទៅដល់ សរសេរថ្នាំឱ្យលេបៗនោះទេ។ ខ្ញុំបានពន្យល់ហើយ ការព្យាបាលគឺដោយថ្នាំ និងមិនមែនថ្នាំ ប៉ុន្តែបងប្អូនជួយគិតទាំងអស់គ្នា។ [មិន]មែនតែប្អូនសុខឆេងនោះទេ គាត់មកពីពោធិ៍សាត់ គាត់មកពីអីណានោះ។ ស្មាទោស! ដេញគាត់ទៅផ្ទះវិញដែរអត់។ (អ៊ី)ចឹង ត្រូវតែធ្វើការព្យាបាលគាត់ និងប្រឹក្សាខ្លីៗទេ មិនបានគ្រប់គ្រាន់ទេ។ ហើយឱ្យគាត់រៀនស្វែងរកវិធីសាស្រ្តដោយខ្លួនឯង ដោយខ្លីៗចឹង។ នេះជាដំណោះស្រាយដែលប្រាប់គាត់ ឱ្យគាត់ជួយផ្នែកវិបត្តិដំណេក»។

 វេជ្ជបណ្ឌិត​យឹម សុបុត្រា នាយ​ផ្នែក​ជំងឺ​ផ្លូវចិត្ត និង​ការ​បំពាន​គ្រឿងញៀន​នៃ​មន្ទីរពេទ្យ​មិត្តភាព​ខ្មែរសូវៀត
វេជ្ជបណ្ឌិត ​យឹម សុបុត្រា នាយ​ផ្នែក​ជំងឺ​ផ្លូវចិត្ត និង​ការ​បំពាន​គ្រឿងញៀន​នៃ​មន្ទីរពេទ្យ​មិត្តភាព​ខ្មែរសូវៀត

យុវវ័យ​គួរ​សម្រាន្ត​ឱ្យ​បាន​យ៉ាងហោច​ណាស់​៧ម៉ោង​ក្នុង​១ថ្ងៃ។ ទំនោរ​នៃ​ការ​កាត់បន្ថយ​រយៈពេល​សម្រាន្ត​ថ្មីៗនេះ នឹង​អាច​បង្ក​ហានិភ័យ​ដូច​ជា ជំងឺ​ធាត់ ទឹកនោម​ផ្អែម ឡើង​សម្ពាធ​ឈាម និង​ជំងឺបេះដូង​ជា​ដើម។ នេះ​បើ​តាម​ការ​ស្រាវជ្រាវ​នៃ​ការិយាល័យ​បង្ការ និង​ប្រយុទ្ធ​ប្រឆាំង​ជំងឺនៃ​សហរដ្ឋ​អាមេរិក ដែល​បាន​ចេញផ្សាយ​កាល​ពី​ពេលថ្មីៗ​កន្លង​ទៅ​នេះ។​

នេះ​បើ​តាម​វេជ្ជបណ្ឌិត យឹម សុបុត្រា មូលហេតុ​ដែល​បណ្តាល​ឱ្យ​កើត​មាន​វិបត្តិ​ដំណេក គឺ​មាន​មូលហេតុ​បីសំខាន់ៗ​៖ ទី១ វដ្តវគ្គ​នៃ​ដំណេក​មិនល្អ។ ទី២ បណ្តាល​មកពី​ផ្លូវ​ចិត្ត​និង​ជំងឺ​ផ្លូវកាយ។ ទី៣ បណ្តាល​មក​ពីការ​ប្រើប្រាស់​សារ​ជាតិញៀន។ ក្នុង៣ចំណុច​ខាងលើ​នេះ វា​មាន​ភាព​លម្អិត​តាមផ្នែក​នីមួយៗ​ទៀត៕

ចែករំលែកតាម៖