ហេហ្វឺ និងសហករណ៍សរីរាង្គខ្មែរ ចាប់ដៃជាផ្លូវការពង្រឹងទីផ្សារកសិផលសរីរាង្គនៅកម្ពុជា

ហេហ្វឺ និងសហករណ៍សរីរាង្គខ្មែរ ចាប់ដៃជាផ្លូវការពង្រឹងទីផ្សារកសិផលសរីរាង្គនៅកម្ពុជា

Heifer និងក្រុមហ៊ុនសហករណ៍សរីរាង្គខ្មែរ ចុះកិច្ចព្រមព្រៀងសហការគ្នា

អង្គការ​ហេហ្វឺ​អន្តរជាតិ​កម្ពុជា (Heifer) និង​ក្រុមហ៊ុន​សហករណ៍​សរីរាង្គ​ខ្មែរ បាន​ចុះ​កិច្ច​ព្រមព្រៀង​លើ​អនុស្សរណៈ​សហការ​គ្នា​លើ​ការ​អនុវត្ត​គម្រោង​ពង្រឹង​សមត្ថភាព ផលិត និង​ទីផ្សារ​តាមរយៈ​ការ​អភិវឌ្ឍ​កសិកម្ម​សរីរាង្គ ក្រោម​ការ​ផ្ដល់​ជំនួយ​ហិរញ្ញវត្ថុ​ពី​អង្គការ​ហេហ្វឺ​អន្តរជាតិ។

ការ​ចុះ​អនុស្សរណៈ​នេះ មិន​ត្រឹម​តែ​ជួយ​ឱ្យ​កសិផល​ខ្មែរ​មាន​ទីផ្សារ​ប៉ុណ្ណោះ​ទេ គឺ​ថែម​ទាំង​ដើរ​តួនាទី​យ៉ាង​សំខាន់​ជា​អ្នក​ចែកចាយ​នូវ​ផលិតផល​សរីរាង្គ​ដល់​អ្នក​ប្រើប្រាស់​ទៀត​ផង។ នាយក​អង្គការ Heifer ប្រចាំ​កម្ពុជា អះអាង​ថា Heifer និង​សហករណ៍​សរីរាង្គ​ខ្មែរ​បាន​រួម​គ្នា​ជួយ​ដល់​ប្រជាកសិករ​ខ្មែរ ក្នុង​ការ​ដាំដុះ​ដំណាំ​សរីរាង្គ​យូរ​មក​ហើយ។ ប៉ុន្តែ​ការ​ប្រកាស​ចាប់​ដៃ​គ្នា​ជា​ផ្លូវ​ការ​នា​ពាក់​កណ្តាល​ខែ​កញ្ញា ឆ្នាំ​២០១៨​នេះ គឺ​ដើម្បី​បង្កើន​ទំនុកចិត្ត​បន្ថែម​ដល់​ប្រជាកសិករ​ខ្មែរ​ដែល​ចូលរួម​ដាំ​ដំណាំ​សរីរាង្គ។

លោកស្រី កែវ គៀង៖ «ហើយ​ថ្ងៃ​នេះ គឺ​យើង​ធ្វើ​កិច្ច​នេះ ដើម្បី​បង្ហាញ​ជា​ផ្លូវការ និង​ជួយ​សហការណ៍​គ្នា​ធ្វើ​យ៉ាង​ណា ដើម្បី​ឱ្យ​សហករណ៍​យើង​ធ្វើការ​ផ្លាស់ប្តូរ​ពី​ការ​ដាំ​ដំណាំ​ដែល​មាន​ជាតិ​ពុល​ទៅ​ជា​ការ​ដាំ​ដំណាំ​ដែល​ប្រកប​ដោយ​សុវត្ថិភាព​ទាំង​ខ្លួន​គាត់​ផង និង​សុវត្ថិភាព​ដល់​អ្នក​បរិភោគ»

លោកស្រី កែវ គៀង នាយកអង្គការ Heifer ប្រចាំកម្ពុជា
លោកស្រី កែវ គៀង នាយកអង្គការ Heifer ប្រចាំកម្ពុជា

បច្ចុប្បន្ន Heifer បាន​គាំទ្រ​ដល់​សហគមន៍​កសិកម្ម​ចំនួន ៦៤ ដែល​មាន​សមាជិក​ជិត​៧​ពាន់​នាក់ ក្នុង​ខេត្ត​ចំនួន​១២។ អង្គការ​នេះ​ក៏​បាន​ធ្វើការ​យ៉ាង​សកម្ម​ជាមួយ​កសិករ​ប្រមាណ​២​ម៉ឺន​គ្រួសារ​ផ្សេង​ទៀត ដូចជា​គម្រោង​ក្រុម​ផលិត​មាន់ ជ្រូក និង​បន្លែ​សរីរាង្គ​ជាដើម។

សហករណ៍​សរីរាង្គ​ខ្មែរ​ជា​ក្រុមហ៊ុន​ខ្មែរ​ដំបូង​បង្អស់​ដែល​បាន​ទទួល​វិញ្ញាបនបត្រ​បញ្ជាក់​គុណភាព​កសិកម្ម​សរីរាង្គ​ស្តង់ដា​សហភាព​អឺរ៉ុប។ ស្ថាបនិក​សហករណ៍​សរីរាង្គ​ខ្មែរ​មាន​ប្រសាសន៍​ថា ការ​ចូលរួម​ពី​គ្រប់​ភាគី​ក្នុង​វិស័យ​កសិកម្ម គឺ​ចាំបាច់​បំផុត។ ដូច្នេះ លោក​ពេញចិត្ត​ដែល​បាន​ចូលរួម​ជា​ចំណែក​ក្នុង​ការ​លើក​កម្ពស់​កសិផល​របស់​ប្រជាកសិករ​ខ្មែរ ក៏​ដូចជា​ចូលរួម​ចំណែក​កាត់​បន្ថយ​ការ​នាំ​ចូល​កសិផល​ពី​បរទេស​ផង​ដែរ។

លោក អៀង សុធារ៉ា៖ «ហើយ​ល្បឿន​លឿន​នេះ មិនមែន​វាស់​តែ​លើ​ទីផ្សារ ដែល​យើង​ឃើញ​លក់​នៅ​តាម​ហាង​នោះ​ទេ ល្បឿន​នេះ​រួម​ចំណែក​ដែល​គាត់​ហូប​នៅ​តាម​ផ្ទះ តាម​របង តាម​សួន​តូចៗ​របស់​គាត់​ទៀត។ ដែល​ធ្វើ​ឱ្យ​ការ​នាំ​ចូល ឬ​ក៏​អ្វីៗ​ដែល​មាន​ជាតិ​ពុល​ច្រើន​ថយ​ចុះ គឺ​វា​បាន​ជំនួស​បន្តិច​ម្តងៗ​នូវ​ផលិតផល​បែប​ហ្នឹង។ ជំនួស​ទី​២ គឺ​អ្វី​ដែល​គាត់​មិន​ចេះ​ដឹង​សោះ …ឱ្យ​គាត់​ងាក​មក​គិត​ពី​បញ្ហា​សុខភាព»

លោក អៀង សុធារ៉ា ស្ថាបនិក​សហករណ៍សរីរាង្គខ្មែរ
លោក អៀង សុធារ៉ា ស្ថាបនិក​សហករណ៍សរីរាង្គខ្មែរ

តំណាង​ប្រជាកសិករ​ដែល​ដាំ​កសិកម្ម​សម្រាប់​ផ្គត់ផ្គង​ឱ្យ​គម្រោង​នេះ​អះអាង​ថា ជីវភាព​គ្រួសារ​លោក​បាន​ល្អ​ប្រសើរ​ជាង​មុន បន្ទាប់​ពី​ងាក​មក​ដាំ​ដុះ​បន្លែ​ដែល​មាន​សុវត្ថិភាព ព្រោះ​តែ​មាន​ទីផ្សារ។ ពិសេស ការ​ដាំ​ដុះ​បន្លែ​ស្តង់ដា​ក៏​មិន​ធ្វើ​ឱ្យ​ប៉ះពាល់​ដល់​សុខភាព​លោក និង​គ្រួសារ​ទៀត។

លោក អែល ម៉ារិល៖ «កាល​ពី​មុន​ជាតិ​គីមី​ធ្វើ​បាន​ផល តែ​អត់​មាន​ទីផ្សារ ដល់​ចឹង​វា​ខាត។ ដល់​ឥឡូវ​ខ្ញុំ​ប្រើ​ជា​សរីរាង្គ​មក មាន​ទីផ្សារ​ល្អ ធ្វើ​បាន​បាន​តម្លៃ​ខ្ពស់​ទៀត។ ជីវភាព​កាន់​តែ​រីក​ចម្រើន​ឡើង»។

តំណាង​ក្រសួង​ពាក់ព័ន្ធ ដូចជា​ក្រសួង​ពាណិជ្ជកម្ម ក្រសួង​កសិកម្ម ក៏​ប្រកាស​ពី​ការ​តាំង​ចិត្ត​ជួយ​គាំទ្រ និង​ជំរុញ​បន្ថែម​ទៀត ដើម្បី​ធ្វើ​យ៉ាង​ណាឱ្យ​ផលិតផល​ខ្មែរ​មាន​ទីផ្សារ​ទាំង​ក្នុង និង​ក្រៅ​ប្រទេស នៅ​ក្នុង​ពិធី​ចុះ​អនុស្សរណៈ​យោគយល់​គ្នា​នេះ​ផង​ដែរ៕

ចែករំលែកតាម៖